Nyuma y’inama yabahuje n’ubuyobozi bw’ikipe, abakunzi ba APR FC biyemeje kujya bagira uruhare mu gutanga inkunga yabo mu ikipe bakunda

Nyuma yo gukurikirana umukino wa gishuti wari wahuje APR FC na Heros,abafana ba APR FC bahise bakorana inama n’ubuyobozi bw’ikipe yabo baakunda kandi bafana kuri uyu wa mbere.Iyi nama yabereye i Nyarutarama, yari iyobowe n’umuyobozi wungirije wa APR FC Gen Mubarak Muganga usanzwe ari umuyobozi w’Ingabo mu Mujyi wa Kigali no mu Ntara y’i Burasirazuba, wari uherekejwe n’umuhuzabikorwa w’abafana ba APR FC Col Kagabagambe, ndetse na Kazungu Edmond uyobora abafana. Gen. Mubarak Muganga yatangije inama atangariza abakunzi ba APR FC ko kimwe mu byo yasabwe ubwo yazanwaga mu mujyi wa Kigali, ari ugukorana n’abafana bakaba hafi y’ikipe kurusha uko byari bimeze mbere, akaba yaboneyeho gutangaza ko hari abakinnyi bane bashya bazaza muri iyi kipe mu kwa mbere gusa amazina atangaza abiri gusa, Mugiraneza Jean Baptiste Migi na Jacques Tuyisenge abandi bakinnyi bagirwa ibanga. Afande Mubaraka akaba yatangaje ko Migi na Jacques bisabiye kuza muri APR FC kugira ngo bagire icyo bayifasha bigahurirana n’uko iyi kipe yari inabakeneye bityo bakaba bazaba bari i Kigali muri Mutarama 2018.Abafana bakaba bahawe umwanya wo gutanga ibitekerezo aho ibyatangajwe byibanze ahanini ku mutoza Jimmy Mulisa bavuga ko byaba byiza iyi kipe izanye nka Mashami Vincent cyangwa Masudi Djuma. Ubuyobozi bwa APR FC bukaba bwavuze ko gahunda ihari ari iyo kuzazana umutoza wungirije, kandi ko ari ikipe izamuhitamo mu minsi mike.Abakunzi b’iyi kipe kandi bakaba biyemeje kuzajya bagira uruhare mu kuyigurira abakinnyi, aho abari bateraniye i Nyarutarama ubwabo bahise bitanga miliyoni zirindwi(7 000 000Frw) zizagira icyo zifasha mu ikipe. Aya mafaranga, akaziyongeraho azava mu ma Fan Club atandukanye aho abacuruzi bakomeye bafana iyi kipe bishyize hamwe bakazatangaza inkunga yabo mu minsi mike. Aha kandi hakaba hashyizweho amakarita y’abafana akazatangira gucuruzwa mu minsi mike, ndetse amafaranga avuyemo agafasha ikipe.Iyi nama ikaba yashojwe abafana bashimiye cyane ubuyobozi ndetse ubuyobozi bubizeza ubufatanye busesuye mu ikipe bakunda kandi banafana. Iyi kipe iakaba iri bukore imyitozo uyu munsi saa kumi (16h00) kuri sitade ya Kicukiro.

Check Also

APR FC ikomeje kuyobora urutonde rwa shampiyona nyuma yo gutsinda Kirehe fc 2-1

APR FC yegukanye amanota atatu y’umunsi wa 6 wa shmpiyona y’icyiciro cya mbere Azam Rwanda ...

One comment

  1. Muraho bakunzi ba gitinyiro, ariko ko mbona mucecetse cyane kuki tutagira ibiganiro kururubuga rwacu, muhaguruke tujye dutanga ibitekerezo byacu kuko birakenewe. Murakoze

Leave a Reply

Your email address will not be published. Required fields are marked *