APR FC yatsinze Marine FC ibitego 2-1 mu mukino wa gicuti wakinwe kuri uyu wa gatandatu tariki ya 31/8/2024 i Shyorongi.
Ni umukino wa gicuti wakinwe mu gihe iy’amarushanwa yabaye ihagaze kubera amajonjora yo guhatanira itike yo kujya mu mikino ya nyuma y’igikombe cya Afurika (CAN) aho Amavubi agomba guhatana na Libya na Nigeria.
Ibitego byombi bya APR FC byatsinzes na Tuyisenge Arsene ku munota wa 11 maze Victor Mbaoma atsinda icya kabiri ku munota wa 48.
APR FC yakinnye uyu mukino idafite abakinnyi 10 barimo 8 bari mu ikipe y’igihugu AMAVUBI na babiri bahamagawe mu makipe y’ibihugu byabo mu mahanga.
Abari mu Amavubi ni Byiringiro Gilbert, Niyomugabo Claude, Niyigena Clement, Nshimiyimana Yunusu, Ruboneka Bosco, Niyibizi Ramadhan, Mugisha Gilbert na Dushimimana Olivier. Abandi ni Pavelh Ndzila wahamagawe muri Congo Brazzaville na Mamadou Sy wahamagawe muri Mauritania.
APR FC iritegura umukino w’ijonjora rya kabiri mu guhatanira igikombe cy’irushanwa rihuza amakipe yabaye aya mbere iwayo uzayihuza na Pyramids FC yo mu Misiri ku itariki ya 14/9/2024 kuri Stade Amahoro saa kumi n’ebyiri (6:00pm).
