Mu mukino utari woroshye APR FC yatsinzwe na Pyramids FC ibitego 3-1 isezererwa ityo mu mikino yo guhatanira igikombe cy’irushanwa rihuza amakipe yabaye aya mbere iwayo (CAF Champions League).
Uwo mukino wabereye mu Misiri kuri uyu wa gatandatu tariki ya 21/9/2024 watangiye APR FC ikina neza nk’ikipe yari ifite intego.
Kugarira neza, guhererekanya umupira nta gihunga no gusatira izamu rya Pyramids FC bya hato na hato ni byo byarangaga abakinnyi b’ikipe y’ingabo z’u Rwanda.
Ibyo byatanze umusaruro mwiza, aho ku munota wa 11 biturutse ku kazi keza kakozwe na Thadeo Lwanga wahereje umupira Ruboneka Bosco, na we awucomekera Byiringiro Gilbert utajijinganyije maze awuhindura imbere y’izamu, ba myugariro ba Pyramids FC bawugarura ujya kwa Dauda Youssif wawufunze maze arekura ishoti umupira awuboneza mu rushundura.
Kuva ubwo byari igitego 1-0, maze Pyramids FC ijya ku nkeke ariko ikomeza gushakisha uburyo bwo kwishyura n’ubwo yasangaga ubwugarizi bwa APR FC bwubakitse neza kuva kuri ba Rutahizamu kugeza kuri Pavelh Ndzila wari mu izamu.
Icyakora ntibyaje guhira iyi kipe rukumbi yari ihagarariye u Rwanda mu marushanwa mpuzamahanga, aho ku munota wa 45 yaje kwishyurwa igitego, bituma igice cya mbere kirangira ari igitego 1-1.
Igice cya kabiri kijya gutangira, Umutoza Darco Novic yakoze impinduka mu buryo bwo gushakira ibisubizo ku ntebe y’abasimbura, akuramo Mugisha Gilbert yinjiza Chidiebere na we wagoye cyane uruhande rw’iburyo rwa Pyramids FC.
Uko iminota yicumaga ni ko umukino wakomezaga kurushaho gukomera, cyane ko buri kipe yari izi neza ko igitego cya kabiri ari cyo cyakora ikinyuranyo.
Byahiriye Pyramids FC kurusha APR FC, irakibona ndetse ahagana impera y’umukino ibona n’icya gatatu, umukino urangira ari ibitego 3-1.
APR FC yahise isezererwa itsinzwe ibitego 4-2 hateranyijwe umukino ubanza n’uwo kwishyura, iba iviriyemo mu ijonjora rya kabiri.
