APR WFC yongeye kunganya ubwa gatatu mu mukino yakinnye na Bugesera WFC.
Wari umukino w’umunsi wa gatatu wa Shampiyona y’icyiciro cya mbere y’abari n’abategarugori wakinwe kuri uyu wa gatandatu tariki ya 19/10/2024.
Umukino watangiye APR WFC igarahaza ko inyotewe gutsinda umukino wa mbere muri Shampiyona y’icyiciro cya mbere.
Byatumaga ihererekanya umupira neza kuva inyuma ukagera imbere, ibyatumaga bamwe bavuga ko Bugesera WFC igatoye muri uyu mukino.
Icyakora kubyaza umusaruro amahirwe yo kubona igitego baremaga byakomeje kugorana, kugeza ubwo igice cya mbere cyarangiraga bikiri 0-0.
Igice cya kabiri kijya gutangira, Umutoza Itangiahaka Blaise na Heritier Ahishakiye bashakiye ibisubizo ku ntebe y’abasimbura, bakurayo Izabayo Clemence na Kamikazi Yvonne baruhutsa Rwemera Kelia na ABIMANA Laurence.
Ibi byatumye umukino uhinduka, umupira ukinirwa cyane mu gice cy’ikibuga cya Bugesera WFC yari yahisemo kwikinira imipira miremire iyifasha gusatira itunguranye.
Icyakora ibyageragejwe n’abatoza ku mpande zombi byafashije kutinjizwa igitego kugeza ubwo iminota isanzwe y’umukino yarangiye bikiri 0-0.
Nyuma yo kunganya umukino wa gatatu yikurikiranya, APR WFC igize amanota 3, ikaba itaratsinda cyangwa ngo itsindwe umukino n’umwe.
