Ubwa kane mu mikino itanu, APR WFC yanganyije na Kamonyi WFC igitego 1-1, ikomeza kudatsindwa umukino n’umwe muri Shampiyona.
Ni umukino w’umunsi wa gatanu wakinwe kuri uyu wa gatandatu tariki ya 02/11/2024, ukaba wabereye kuri Stade Kamena mu Karere ka Huye.
Nk’ikipe itaratakaza umukino n’umwe n’ubwo ari bwo izamutse iva mu cyiciro cya kabiri kandi ikaba itaraguze abandi bakinnyi, APR WFC yatangiye itinyitse imbere ya Kamonyi.
Ibyo byatumye Kamonyi itabasha guhuza umukino n’ubwo ari ikipe igizwe n’abakinnyi benshi bakiri bato ariko na bo bamenyereye Shampiyona y’icyiciro cya mbere.
APR WFC yageragezaga gukina umukino wo hasi wiganjemo guhererekanya cyane byayikundiye ndetse irema amahirwe yo kuba yakwinjiza igitego ubugira 3 mu gice cya mbere ariko amahirwe aba make, kinarangira banganya 0-0.
Igice cya kabiri gitangira, Umutoza Itangishaka Blaise yakoze impinduka ku mukinnyi umwe, akuramo Uwase Vanessa wakinaga umukino we wa mbere, yinjiza Abimana Laurence.
Iyi kipe y’ingabo yakomeje kuyobora umukino ariko Kamonyi WFC yari yahisemo gukina imipira miremire gusa, ikomeza kwihagararaho.
Byategereje umunota wa 72 kugirango Kamonyi WFC yinjize igitego, cyaturutse ku mupira watewe uturutse mu bwugarizi bwawo, ab’inyuma ba APR WFC ntibabasha kumvikana neza n’Umunyezamu.
Ibyo ariko ntibayaciye intege abakinnyi b’iyi kipe y’ingabo, kuko bakomeje kotsa igitutu ab’inyuma ba Kamonyi WFC, kugeza ubwo bishyuye igitego ku munota wa 81.
Bakomerejeho ndetse bakajya bahusha ibindi birimo nk’uburyo bwabonetse ubwo ku munota wa 89 Uwase Fatina yacengaga abakinnyi 6 atera ishoti ariko umupira uca ku ruhande gato.
Amakipe yombi yarangije agabanye amanota, bituma APR WFC igira amanota 7 ikarushwa inota rimwe na Kamonyi WFC zikurikiranye ku rutonde rwa Shampiyona y’icyiciro cya mbere y’abari n’abategarugori.
APR WFC izagaruka mu kibuga kuwa gatandatu tariki ya 09/11/2024 ikina n’Indahangarwa WFC, umukino ukazabera mu Karere ka Ngoma.
