Abana bo mu irerero rya APR FC n’ab’INTARE FC batangiye neza mu irushanwa “Community Youth League” ryatangijwe ku mugaragaro kuri uyu wa gatandatu tariki ya 02/11/2024.
Ni irushanwa rizamara amezi atatu, rikaba rizahuza amakipe y’abana mu byiciro bitatu, bitoreza mu marerero 18 atandukanye mu Mujyi wa Kigali.
Abo bana bazarushanwa mu byiciro by’abatarengeje imyaka 10 (U-10), abatarengeje imyaka 13 (U-13) n’abatarengeje imyaka 15 (U-15).
Ni irushanwa rizaba rikinwa ku nshuro ya kabiri, ndetse ubwo ryakinwaga bwa mbere mu mpeshyi y’uyu mwaka, APR FTC yegukanye igikombe mu cyiciro cya U-15, mu gihe INTARE FTC yacyegukanye muri U-13, n’aho Imena FA ari yo yagitwaye muri U-10.
Iryo rushanwa ritegurwa na Project Team Work iyoborwa na Ashraf Kadubiri Munyaneza, Umunyabigwi mu mupira w’amaguru mu Rwanda, akaba afatanyije n’abandi banyabigwi bagenzi be ndetse n’amakipe nka APR FC, INTARE FC, La Jeunesse FC, Future Generation FTC, Kalibu FC na Assoussa FC.
