Ibitego 2 bya Mamadou Sy ni byo APR FC yatsinze Vision FC mu mukino w’umunsi wa 8 wa Rwanda Premier League.
Abakinnyi ba APR FC batangiye umukino nk’abafitiye umwenda abakunzi bayo.
Ibyo byagaragazwaga n’uburyo bahererekanyaga umupira neza kandi bagaragaza inyota yo gutsinda.
Kotsa igitutu Vision FC ni byo byavuyemo penaliti yabonetse ku munota wa 11, maze Mamadou Sy ahita ayibyaza igitego cya mbere.
Vision FC yakomeje kwirwanaho ngo itinjizwa ikindi gitego, ari na ko inyuzamo ikagerageza ku gishaka ariko bikaba iby’ubusa.
N’ubwo na APR FC ari ko yageragezaga gushaka ikindi gitego, ikarema uburyo bwabyara Ibitego ariko amahirwe akaba maze, byatumye igice cya mbere kirangira ari igitego 1-0.
Igice cya kabiri urebye nta mpinduka cyatangiranye, APR FC yakomeje kuyobora umukino nk’uko byahoze mu gice cya mbere.
Icyakora kubona ikindi gitego byakomeje kugorana, Umutoza Darco Novic aafata icyemezo akuramo Mahamadou Lamine Bah wari wahushije uburyo butatu bwabyara ibitego, maze yinjiza Niyibizi Ramadhan.
Byatumye umukino urushaho kuba mwiza kuri APR FC ari na ko urushaho gukomerera Vision FC, ndetse ntibyanatinze, iyi kipe y’ingabo yahise ibona igitego cya kabiri na cyo cyatsinzwe na Mamadou Sy kuri penaliti yari imukorewe.
Mu buryo bwo kugerageza gushaka ibindi bitego, Umutoza Darco Novic yongeye gukora impinduka, akuramo Mugisha Gilbert na Mamadou Sy hinjira Victor Mbaoma na Tuyisenge Arsene.
Ibi n’ubwo byatumye APR FC igumana imbaraga n’umukino mwiza yakinaga, ntacyo byahinduye ku mubare w’ibitego.
Ahagana mu minota ya nyuma, Umutoza yaje no gukuramo Richmond Lamptey na Ruboneka Bosco yinjiza Mugiraneza Frodouard na Dushimimana Olivier Muzungu.
Ibi na byo byafashije APR FC kutigaranzurwa na Vision FC, ariko na yo ntiyashoboye kugira ikindi gitego yinjiza, ari na yo mpamvu umukino warangiye ari ibitego 2-0.
Uyu wari umukino wa kane APR FC ikinnye, ikaba yaratsinzemo ibiri, umwe yawunganyijemo na Etincelles FC, undi umwe iwuterwamo mpaga na Gorilla FC, bivuze ko igize amanota 7.
