Ikipe y’abato ya APR WFC hamwe n’andi marerero y’icyitegerezo bitabiriye National Talent Week iberamo n’irushanwa ryiswe “Best Student Athlete”.
Ni gahunda y’umwiherero w’amakipe y’abato yateguwe na Ministeri ya Siporo yatangiye kuri uyu wa gatanu tariki ya 31 Ukwakira ikazageza ku cyumweru tariki ya 3 Ugushyingo 2024 mu Karere ka Huye na Gisagara, mu bigo nka GSO Butare, TTC Save ndetse no kuri Stade ya Huye.
Uwo mwiherero uhuriyemo abana 500 batarengeje imyaka 16 (U-16) baturutse mu bigo bisanzwe bikoreramo Porogaramu Isonga, ndetse n’andi marerero arimo APR WFC U-16, PSG mu bakobwa, Bayern Munich, Intare FC U-16 na Tony Football Academy.
Uyu mwiherero uri gukorwa mu mikino itandatu irimo umupira w’amaguru, Volleyball, Basketball, gusiganwa ku magare, Handball no gusiganwa ku maguru.
By’umwihariko mu cyiciro cy’abakobwa, APR WFC iri kumwe na PSG, GS Mukarange isanzwemo irerero muri Porogaramu Isonga.
INTARE FC U-16 yo iri kumwe na PSG, Bayern Munich, GS Kabare ikoreramo Porogaramu Isonga na Tony FA.
Abazahiga abandi bazahabwa ibikombe, buruse zo kwiga n’ibikoresho bitandukanye.
