Anne Mbonimpa wari Umutoza wa APR WFC yashyinguwe

Mu gahinda, Anne Mbonimpa wari Umutoza wa APR WFC yashyinguwe kuri uyu wa gatatu tariki ya 13/11/2024.

Ni umuhango wakozwe n’Umuryango avukamo ndetse n’uwo yashatsemo, ukaba wari witabiriwe n’inshuti n’abavandimwe.

Abakinnyi bahagarariye abandi ba APR WFC n’INTARE FC, abatoza bose bo mu mushinga wa APR FC w’Iterambere ry’umupira w’amaguru ni bamwe mu batabaye ndetse bagira uruhare mu ishyingurwa mu cyubahiro gikwiriye uyu mutoza.

Uwo muhango kandi witabiriwe na Perezida wa FERWAFA, Munyatwari Alphonse wari kumwe n’abo bafatanyije kuyobora iri shyirahamwe ndetse n’abakozi baryo.

Uwari uyoboye itsinda rya APR WFC n’INTARE FC muri uwo muhango, Bwana Gatibito Byabuze yashimiye Ubuyobozi bwa APR FC by’umwihariko Chairman, Brig.Gen Deo Rusanganwa ku nkunga yatumye umuryango wa Anne Mbonimpa utabarwa kandi ugafatwa mu mugongo.

*APR WFC na INTARE FC bashyikiriza Umugabo wa Anne Mbonimpa ubutumwa bwo kukufata mu mugongo*

Ubwo Ubuyobozi bw’ingabo z’u Rwanda bwafataga umwanzuro wo kongera gushinga APR WFC mu 2021, Anne Mbonimpa yatoranyijwe mu bandi batoza beza, ahabwa inshingano zo kwegeranya abakinnyi beza bakiri bato maze akabatoza.

Ahereye ku bana bitorezaga mu INTARE FTC i Huye, mu 2022 APR WFC yakinnye irushanwa rya FERWAFA ryahuje abatarengeje imyaka 17, icyo gihe hamwe n’iyo kipe Anne Mbonimpa yegukanye umwanya wa 3 mu gihugu.

Ibyo byatumye akomeza kugirirwa icyizere ndetse ikipe ye ihita yandikishwa muri Shampiyona y’icyiciro cya kabiri y’abari n’abategarugori yakinwe mu 2022/2023.

N’ubwo yakinishaga Abakinnyi bato cyane, iyi kipe Anne Mbonimpa yatozaga yitwaye neza, yegukana umwanya wa gatatu iwutsindiyeho Nasho WFC ibitego 3-0, ikaba yari yasezerewe n’Indahangwa WFC muri 1/2.

Umwaka wakurikiyeho APR WFC yongeye gukina Shampiyona y’icyiciro cya kabiri, ihita izakuka mu cyiciro cya mbere, iyi kipe yatozwaga na Anne Mbonimpa ikaba yarabigezeho idatsinzwe umukino n’umwe, aho yanganyije rimwe gusa.

Muri Mutarama 2024 ni bwo Ubuyobozi bwa FERWAFA bwamubengutse nyuma yo gusanga ibyiza akora muri APR WFC byarishaho kugira akamaro abokoze muri rusange nk’Umukozi w’ishyirahamwe ry’umupira w’amaguru bityo n’andi makipe akarushaho kubyungukiramo.

Bitewe n’uko iterambere ry’umupira w’amaguru ari yo ntego, Ubuyobozi bwa APR WFC ntibwazuyaje, bwamubaye uburenganzira ajya gukora muri FERWAFA nk’Umukozi ushinzwe Iterambere ry’umupira w’amaguru w’abari n’abategarugori.

Kuwa gatandatu tariki ya 9/11/2024 ni bwo hamenyekanye inkuru y’inshamugongo ivuga ko uwo munyabigwi yitabye Imana, akaba yashyinguwe kuri uyu wa gatatu tariki ya 13/11/2024 mu irimbi rya Mayange.

Ushaka kureba uko APR WFC b’INTARE FC basezeye bwa nyuma Umutoza Anne MBONOMPA, kanda hano