Ubwo hatangizwaga irushanwa FERWAFA Youth League APR FC U-17 yatsinze Rayon Sports U-17 ibitego 9-1.
Ni umukino wabereye kuri Kigali Pele Stadium kuri iki cyumweru tariki ya 17/11/2024.
Nk’ibisanzwe nta mukino uhuza aya makipe ujya woroha, ibi ni byo byatumye APR FC U-17 itangirana imbaraga zanatumye ibasha kubona ibitego byinshi hakiri kare, ku buryo igice cya mbere cyarangiye iyi kipe y’ingabo ifite ibitego 7-1 byinjiye mu minota 30 ya mbere.
Igice cya kabiri na cyo APR FC U-17 yakomeje kuyobora umukino irusha Rayon Sports, aho intego y’iyi kipe yo gutsinda yari yongewemo no gukina umukino mwiza usukuye, umwe uryoheye ijisho.
Byakomeje kuyihira, yongeraho ibindi bitego bibiri, umukino urangira ari ibitego 9-1.
Iyi kipe ya APR FC U-17 igizwe n’abakinnyi basanzwe bitoreza muri iki cyiciro muri APR FTC, biganjemo abatangiranye n’iri irerero mu mpeshyi ya 2022.
Mu bakobwa, APR WFC U-17 yari yakiriye Police WFC U-17, iyi kipe y’ingabo ikaba yatsinze ibitego 2-1 mu mukino na wo wabereye muri Kigali Pele Stadium.
