APR FC yanganyije 0-0 na Etincelles FC umukino w’umunsi wa kane wari uwa mbere ku iyi kipe y’ingabo z’u Rwanda muri Rwanda Premier league.
Uyu mukino wakinwe kuri iki cyumweru tariki ya 29/9/2024, ukaba wabereye kuri Stade Umuganda mu Karere ka Rubavu.
Umukino watangiye amakipe yombi asa n’acungacungana ku jisho, APR FC ikarusha Etincelles FC kwiharira umupira, n’iyi kipe y’i Rubavu yanyuzagamo igasatira itunguranye.
Igice cya mbere cyarangiye amakipe yombi adashoboye guhagurutsa abakunzi bayo.
Ibyo byatumye Umutoza Darko Novic atangirana iminduka igice cya kabiri, aho Niyibizi Ramadhan na Taddeo Lwanga basimbuwe na Richmond Lamptey ndetse na Kwitonda Alain ‘Bacca’, mu gihe nyuma y’aho gato Lamine Bah na we yahaye umwanya Tuyisenge Arsene.
Izi mpinduka zatumye APR FC itangira kurusha cyane Etincelles FC binyuze mu buryo bw’ibitego bwaremwaga n’abarimo Lamptey, ari ko Victor Mbaoma n’abo bafatanyaga mu busatirizi ntibahirwe ngo baboneze mu rushundura.
Nyuma yo guhusha ibitego byinshi, Victor Mbaoma yasimbuwe na Mamadou Sy, Yussif Dauda na we asimburwa na Johnson Nwobodo Chidiebere.
Iminota isanzwe y’umukino yarangiye amakipe yombi anganyije 0-0.
