APR WFC yatsinze ES Mutunda ibona amanota atatu ya mbere muri Shampiyona y’icyiciro cya mbere y’abari n’abategarugori.
Ni mu mukino w’umunsi wa kane wa Shampiyona wakinwe kuri uyu wa gatandatu tariki ya 26/10/2024.
Uyu mukino APR WFC yagiye kuwukina inyotewe amanota, dore ko yari itaratsinda umukino n’umwe muri itatu yari imaze gukina n’ubwo itanatsinzwe n’umwe.
Ibi byatumye iyobora umukino kuva ku munota wa mbere n’ubwo ububi bw’ikibuga na bwo butatumaga ikina umukino wayo wo guhererekanya umupira umwe ku wundi.
Igitego kimwe rukumbi cyabonetse muri uyu mukino cyatsinzwe na Akimana Marthe mu gice cya kabiri cyawo.
APR WFC izagaruka mu kibuga ikina na Kamonyi WFC kuwa gatandatu tariki ya 2/11/2024, umukino uzabera kuri Stade Kamena mu Karere ka Huye.
