APR FC U-17 na APR WFC U-17 bahacanye umucyo, batsinda amakipe bahataniye amanota ku munsi wa 7 wa FERWAFA YOUTH LEAGUE U-17.
Ni imikino yakinwe kuri uyu wa gatandatu tariki ya 11/01/2025.
APR FC U-17 yari yakiriwe na Real Moon FA ku kibuga cy’i Gashora, umukino urangira ikipe y’ingabo itsinze ibitego 4-3.
Ni ibitego bya Ishimwe Patrick ku munota wa 1 w’umukino n’icyo myugariro wa Real Moon FA yitsinze, iyi kipe yakiniraga mu rugo ikaba yishyuye mo kimwe maze igice cya mbere kirangira ari ibitego 2-1.
Mu gice cya kabiri APR FC U-17 yari yifitemo guhatana gukomeye yashoboye kwinjiza ibindi bitego bibiri bya Ishimwe Hirwa Thierry na INEZA Alonso.
Icyakora iminota ya nyuma y’umukino ntiyari myiza ku ikipe y’ingabo kuko igitutu cy’abafana cyagize uruhare mu kwinjiza ibitego bibiri mu minota y’inyongera bituma umukino urangira ari ibitego 4-3.
APR FC U-17 izagaruka mu kibuga kuwa gatandatu tariki ya 18/01/2025 ikina na Love for Hope FA, umukino ukazabera i Shyorongi saa saba (1:00pm).
Mu bakobwa, APR WFC U-17 yaseye itanzitse imbere y’Inyemera WFC U-17, iyitsinda ibitego 8-0 mu mukino wabereye kuri Stade Kamena.
Aya makipe mato ya APR FC yombi ayoboye urutonde rwa Shampiyona, aho APR FC U-17 irusha Gorilla FC U-17 amanota 3, mu gihe APR WFC U-17 yo ari iya mbere n’amanota 21/21 ikarusha Indahangarwa WFC U-17 amanota 3.
