APR FC ikomeje imyitozo yitegura umukino w’umunsi wa 10 wa Rwanda Premier League (RPL), ndetse Dauda Yousif wari waravunitse yagarutse.
Kuri uyu wa kabiri tariki ya 19/11/2024 APR FC yakomeje imyitozo yitegura umukino w’umunsi wa 10 wa Rwanda Premier League, aho izakina na Muhazi United.
Ni umukino uteganyijwe kuba kuwa gatandatu tariki ya 23/11/2024, APR FC ikazaba yakiriye Muhazi United kuri Kigali Pele Stadium.
Usibye Dauda Yousif wagarutse mu myitozo, biteganyijwe ko n’abakinnyi bari barangiye gukinira Amavubi bagaruka mu myitozo kuri uyu wa gatatu.
Ni mu gihe Mamadou Sy na Thadeo Lwanga bo baza kugera i Kigali kuri uyu wa gatatu na bo bagahita bakomereza hamwe n’abandi kwitegura uwo mukino.
Abakinnyi barasaba abakunzi ba APR FC gukomeza kubaba hafi bakabashyigikira, dore ko iyo ari benshi nta gushidikanya igitego cya mbere kiba ari icyabo, mu kibuga bakaba bafite umukoro wo gushaka icya kabiri n’ibindi byakurikiraho.
