Ikipe ya APR FC yamaze kwemeza ko izitabira irushanwa rya CECAFA Kagame Cup rizabera muri Tanzania hagati y’amatariki ya 2-15 Nzeri uyu mwaka wa 2025.
Ni irushanwa rihuza amakipe yo muri karere ka Afurika yo hagati n’iy’iburasirazuba, rizaba rikinwa ku nshuro ya 45 rikabera mu mujyi wa Dar es Salaam nkuko byagenze umwaka ushize ubwo twakinaga umukino wa nyuma.
Amakipe 12 ni yo azakina CECAFA Kagame Cup y’uyu mwaka
Singida Black Stars FC, yatomboye mukeba Rayon Sports muri CAF Confederation Cup, ni yo izaba ihagarariye Tanzania mu gihe Mogadishu City Club izahagararira Somalia.
Vipers SC (Uganda), El Merriekh SC Bentiu (South Sudan), Mlandege SC (Zanzibar), Kenya Police FC (Kenya), Flambeau du Centre (Burundi), Garde Cotes FC (Djibouti), Ethiopian Coffee SC (Ethiopia) na Al Hilal Omdurman na Alahly SC Wad Madani za Sudani ni yo makipe yandi azaba ari muri Tanzania.
Bitandukanye n’umwaka ushize, uyu mwaka nta kipe yatumiwe muri CECAFA Kagame Cup.
APR FC izanye imibare yihariye muri CECAFA Kagame Cup uyu mwaka
Ikipe y’ingabo z’igihugu ihagarariye u Rwanda, ni yo kipe muri 12 azakina CECAFA Kagame Cup y’uyu mwaka yatwayeho iri rushanwa, aho iheruka twayitwariye kuri Stade Amahoro mu mwaka wa 2010 dutsinze Saint George yo muri Ethiopia.
Ibindi bikombe bibiri bisigaye ikipe ya APR FC yabitwaye muri 2004 na 2007 aho uyu mwaka hari icyizere ko igikombe cya kane cyataha i Kigali.
Ikipe ya Simba yo muri Tanzania na AFC Leopards yo muri Kenya ni zo zimaze kwegukana iri rushanwa kenshi, aho zaritwaye gatandatu, mu gihe Yanga na Tusker nazo zo muri ibyo bihugu zaryegukanye inshuro eshanu buri imwe.
Tombola y’uko amakipe azahura iri kuri uyu wa Kabiri
Ubuyobozi bwa CECAFA bwatangaje ko tombola y’uko amakipe azahura muri CECAFA Kagame Cup uyu mwaka iteganyijwe tariki ya 26 Kanama 2025 aho hazanatangazwa umubare w’amatsinda azakorwa.
Ikipe ya APR FC cyo kimwe n’andi makipe agomba kuba yageze i Dar es Salaam bitarenze tariki ya 30 Kanama 2025 azaba ari kuwa Gatanu w’iki cyumweru.