Cart Total Items (0)

Cart

Uretse abakinnyi b’abanyarwanda bakinira APR FC bahamagawe mu ikipe y’igihugu y’u Rwanda “Amavubi” barimo Ishimwe Pierre, Byiringiro Jean Gilbert, Nshimiyimana Yunussu, Ruboneka Jean Bosco na Mugisha Gilbert hari n’abakinnyi b’abanyamahanga bahamagawe mu makipe y’ibihugu byabo.

Abakinnyi b’abanyamahanga bahamagawe barimo Ronald Ssekiganda ukina mu kibuga hagati yugarira na Denis Omedi ukina asatira izamu, bombi bahamagawe mu ikipe y’igihugu ya Uganda, naho Mamadou Sy yahamagawe mu ikipe y’igihugu ya Mauritania bose bahamagawe mu mikino y’umunsi wa 9 mu gushaka itike y’igikombe cy’isi cya 2026 kizabera muri Leta Zunze Ubumwe z’Amerika, Mexique na Canada.

Kuri uyu wa Gatanu ikipe y’igihugu ya Uganda yakinnye na Botswana kuri Obed Itani Chilume Stadium, umukino warangiye Uganda itsinze Botswana igitego 1-0 Ronald Ssekiganda na Denis Omedi ntibagaragaye muri uyu mukino.

Denis Omedi na Ronald Ssekiganda ntibakoreshejwe n’umutoza Paul Put ku mukino wa BotswanaUganda izarangiza imikino yo mu itsinda G ikina na Algeria tariki 14 Ukwakira muri Algeria. Algeria yamaze kubona itike y’igikombe cy’Isi naho Uganda iri guhatana ngo irebe ko yabona itike yo kuzakina imikino ya kamarampaka.

Ikipe ya Mauritania yakinnye na Sudan mu mukino warangiye ari 0-0, Mamadou Sy ntabwo yabanje mu kibuga, yaje kwinjira asimbuye Beyatt Lekweiry ku munota wa 87′ ariko ntiyabashije gufasha ikipe ye kubona igitego.

Maurtania izasoza imikino yo gushaka itike y’igikombe cy’isi tariki 14 Ukwakira ikina na Senegal muri Senegal. Ku rutonde rw’itsinda B ntabwo bishoboka ko yabona itike y’igikombe cy’isi kuko iri ku mwanya wa 5 mu makipe 6, ifite amanota 7 n’umwenda w’ibitego 5 mu mikino 9.