Kuri uyu wa gatanu tariki ya 05/04/2024 ni bwo hakozwe umuhango wo gusezera bwa nyuma Nyakwigendera Adel-Zrane wari Umutoza wa APR FC ushinzwe kongerera ingufu abakinnyi.
Ni umuhango wateguwe n’Ubuyobozi bwa APR FC, ukaba waritabiriwe n’abakunzi n’abafana b’iyi kipe y’ingabo, Abanyamakuru, abahagarariye andi makipe atandukanye mu Rwanda, n’abandi bakunzi b’umupura w’amaguru muri rusange.
Ni umuhango wabereye ku cyicaro gikuru cya APR FC ku Kimihurura, ukaba waritabiriwe kandi n’Umuryangango w’Umutoza Adel-Zrane wari uhagarariwe n’Umugore we ndetse na Murumuna we. Hari kandi Umunyamabanga Uhoraho muri Minisiteri ya Siporo ari na we wari Umushyitsi mukuru.
Ubutumwa bwatangiwe muri uwo muhango, bwose bwibanze ku budasa bw’Umutoza Adel-Zrane mu gihe kitageze ku mwaka yari amaze muri iyi kipe, aho yabaniye neza buri wese mu buryo budasanzwe, agakunda u Rwanda mu buryo bukomeye.
Umugore we yatangaje ko bari banafite gahunda yo kugura ubutaka bagatura mu Rwanda, ibyo bigashumangira ibyari byagarutsweho na Murumuna wa Adel-Zrane wavuze ko yakunze u Rwanda ku buryo ari na ho Imana yashimye ko ari ho ahumekera umwuka we wa nyuma.
Umuyobozi wa APR FC, Col. Richard KARASIRA yashimiye abakomeje gufata mu mugongo Umuryango wa APR FC muri rusange n’Umuryango wa Adel-Zrane by’umwihariko, ashimangira ko umubano hagati y’iyi miryango yombi yari nta makemwa, kuko bari banafitanye imishinga migari y’iterambere.
Yakomeje asaba Umugore wa Adel-Zrane ko iyo mishanga irimo uwo kubaka ivuriro rishinzwe gukurikirana no kwita ku mvune z’abakinnyi, itahagarara.
Mu izina rye bwite, irya Minisiteri ya Siporo ndetse na Leta y’u Rwanda muri rusange, Umunyamabanga Uhoraho muri Minisiteri ya Siporo, Bwana Zephanie NIYONKURU, yihanganishije Umuryango wa Adel-Zrabe, APR FC muri rusange ndetse n’abakunzi ba siporo.
Amashusho (Video) Kanda Hano: https://www.youtube.com/live/9j1bN5o7htQ?si=eg2T87jUBv56XxvC
Coach Adel-Zrane Imana imwakire maze aruhuke mumahoro.
