Mu rwego rwo gukomeza imyiteguro y’umwaka w’imikino wa 2026/2027, ikipe ya APR FC yatangiye imikino ya gicuti itsinda Intare FC ibitego 3-0 mu mukino wabereye ku kibuga cy’imyitozo.
Uyu mukino wahaye umutoza Taleb amahirwe yo kureba urwego rw’abakinnyi be no gukomeza kubamenyereza gukinana, aho yakoresheje amakipe abiri atandukanye hagati y’igice cya mbere n’icya kabiri.
Mu gice cya mbere, APR FC yabanje mu izamu Christian Mudahigwa. Ubwugarizi bwari bugizwe na Ishimwe Abdoul na Nduwayo Alex hagati, mu gihe Ombolenga Fitina yakinaga ku ruhande rw’iburyo naho Bugingo Hakim ku ruhande rw’ibumoso.
Mu kibuga hagati hari Ngabonziza Pacifique, Rubuguza Jean Pierre na Iraguha Hadji, mu gihe imbere hari Denis Omedi na Hakim Kiwanuka bakinaga ku mpande, Uwiyaremye Fidali akaba ari we wari uyoboye ubusatirizi.
APR FC yatangiye umukino neza, maze ku munota wa 3 Uwiyaremye Fidali afungura amazamu, igice cya mbere kirangira ikipe y’Ingabo z’Igihugu iyoboye n’igitego 1-0.
Agarutse avuye kuruhuka, umutoza Taleb yahinduye ikipe yose kugira ngo aha umwanya abandi bakinnyi. Mu izamu hinjiye Ernan Siluane, mu bwugarizi hakina Nshimiyimana Yunusu na Ssekiganda hagati, Ishimwe Christian ku ruhande rw’ibumoso na Byiringiro Jean Gilbert ku ruhande rw’iburyo.
Mu kibuga hagati hakinnye Dauda na Mamadou Traoré, mu gihe Memel Dao na Amani Kouadiokan Michel bakinaga inyuma y’abasatirizi Djibril Ouattara na William Togui.
APR FC yakomeje kwiharira umukino, maze ku munota wa 53 Djibril Ouattara atsinda igitego cya kabiri mbere y’uko Amani Kouadiokan Michel asoza umukino atsinda igitego cya gatatu ku munota wa 89.
Umukino warangiye APR FC itsinze Intare FC ibitego 3-0, itangira neza gahunda y’imikino ya gicuti iri gukoresha mu kwitegura umwaka mushya w’imikino.
APR FC ikomeje imyiteguro y’umwaka w’imikino wa 2026/2027 ndetse n’irushanwa rya CECAFA Kagame Cup riteganyijwe kubera mu Rwanda guhera ku wa 24 uku kwezi. Umukino wa mbere w’iyi kipe muri iri rushanwa uzayihuza na Goh Maria FC tariki 24 Nyakanga kuri Stade Amahoro, saa moya z’umugoroba (19:00).
Kanda Hano urebe AMAFOTO Yaranze uyu mukino : https://yvank.pixieset.com/aprfcvsintarefc/
Kanda hano urebe uko umukino wagenze mu MASHUSHO : https://youtu.be/MPFK9glsH-M?si=xJ_1tpWK0BFuSHb_